Dua ti nadangran iti napasamak a panagdinnungpar dagiti dua a motorsiklo iti along national highway sakupen ti Barangay Sta. Monica, ili ti Magsingal.
Ti nagmaneho ti Honda click 125 motorcycle ket agtawen ti tallopulo ket walo, naasawaan, fruit vendor ken residente ti Barangay Sta. Cruz, Sto Domingo.
Ti met nagmaneho ti Yamaha Aerox 155 ket agtawen ti duapulo ket walo ken agnaed ti Barangay Caraisan, Magsingal.
Iti pannakiuman ti Bombo Radyo Vigan ken ni PLT. William Costales, agpapa-amianan a direksion ti click idin ta adda ti maysa a lugan iti bangir a linya a nagsardeng tapno maikkan gundaway ti click nga agsikko a mapan iti ospital.
Nupay kasta, ti Aerox nga agpapa-abagatan a direksion nga adda iti outer lane ket saan na a nadlaw ti Click nga agsikko rason ti panagdinnupar-da.
Na-fracture ti akin-kannawan a luppo ti nagmaneho ti click ken nadunor iti agduduma a paset ti bagi ti drayber ti Aerox nga agpada a naipan iti balay pagagasan para ti naan-anay a pannakataming-da.
