Rinugianen ti Department of Social Welfare and Development ti panagaramat iti real-time data analytics system para iti napaspaspas ken makita ti pagkasapulan dagiti apektado a komunidad iti panawen ti didigra.
Babaen ti Disaster Response Operations Management, Information, and Communications unit ken iti pannakitinnulong ti Micropinacle Technology Corporation, napagtitipon iti maymaysa a plataporma ti rekord iti nadumaduma a nagtaudanna.
Segun ken ni DSWD-Disaster Response Management Group Assistant Secretary ken Spokesperson Irene Dumlao, ad-adda a napaspas, nalawag, ken transparent ti operasion ti ahensia.
Innayon ti ahensia a masungbatan ti baro a sistema ti nabayagen a parikut iti panangiggem iti dadakkel a datos manipud kadagiti 18 a regional office.
