Posible nga overpriced dagiti test kits a ginatang ti Department of Health (DOH) babaen ti Procurement Service of the Department of Budget and Management iti salinong ti Duterte administration iti baet ti covid-19 pandemic.
Dayta ti binabalaw ni Marikina City 2nd District Rep. Stella Luz Quimbo iti panagdenggeg ti House Committee on Appropriations inaig iti panagiyakar ti pondo ti DOH iti PS-DBM nga aggatad ti P47.6 bilion.
Segun ken ni Quimbo, umab-abot agingga lima gasut a pisos ti nagdumaan ti presyo dagiti test kit uray agpapadada iti brand.
Inlawlawag ni DOH Secretary Teodoro Herbosa nga adda dagiti gundaway nga agbaliw-baliw ti presyo dagiti test kits nakadepende iti panawen wenno aldaw iti panaggatang, nga inanamungan ni dati a Health Secretary Francisco Duque.
Innayon ni Duque a ti transaksyon mainaig dayta ket inaramid ti PS-DBM nga isu ti direkta a nakipatang kadagiti supplier.
Kinuna met ni House Deputy Majority Leader ken Iloilo 1st District Rep. Janette Garin a dati DOH secretary a naliklikan koma ti kontrobersyal nu saan nga inyakar ti DOH iti PS-DBM ti pondoda ken binabalawda ti kinaawan ti memorandum of agreement iti nagbaetan dagiti dua nga ahensya iti paggatang ti covid-19 supply.
