VIGAN CITY – Nakemmeg ni Miller Bac-A Aludos, agtawen iti tallopulo, self-employed, addaan ti live-in partner nga agnaed idiay Tabbak, Bakun, Benguet ta naalaan ti maysa a kilo ti mapapati a bulong ti marijuana idiay Sitio Camay, Barangay Comillas North, Cervantes, Ilocos Sur.
Bayat nga isaysayangkat ti scheduled checkpoint iti Cervantes Municipal Police Station, napasardeng ti suspek ket nakiddaw ti panangipresentarna iti lisensya ken OR/CR iti motorsiklo ngem napaay a nangipakita.
Apaman a linukatan ti suspek ti U-box iti motorsiklo ket maysa a bundle ti mapapati a napagango a bulong ti marijuana iti nakita dagiti otoridad a gappuanan ti insigida a pannakakemmegna.
Naala kenkuana ti nasao a maysa a kilo ti napagango a bulong marijuana a mapatta-patta nga aggatad ti P120,000 ken Honda Click 160 a motorsiklo a color red.
