Paimbestigaran ni Senate Committee on Agriculture, Food and Agrarin Reform Chairman Kiko Pangilinan ti sobra nga importasyon iti sibuyas ken dadduma pay a produkto iti agrikultura.
Maipanggep payen dayta iti naabandona nga P86 million a gatad ti imported a nalabbaga a sibuyas a napanawan laeng iti Manila International Container Port (MICP).
Manamnama ti pannakaipatungpal ti imbestigason kadagiti sumarsaruno nga aldaw maipanggep ti over-importation iti agricultural goods kasta payen ti report a laplapdan dagiti operators ti access dagiti mannalon ken mangngalap iti cold storage a gappuanan iti pannakalugi ken pannakadadael dagiti mula.
Karaman kadagiti mapaayaban dagiti naikkan ti permit tapno maka-operate iti cold storage tapno maiyatiddog ti over-importation ken ti isyu nga iresreserbar dagiti traders iti cold storage ken awan ti pangipenpenan dagiti mannalon.
Sinitar ni Pangilinan ti nagdumaan iti listaan ti Department of Agriculture (DA) ken ti dadduma pay nga ahensya maipanggep ti domestic supply ken demand iti sibuyas ta posible a gappuanan ti oversupply ken dadaelenna iti pagbiagan dagiti mannalon nga agmulmula iti sibuyas.
