VIGAN CITY – Nakaawiden idi pay laeng naminsan nga aldaw ditoy Pilipinas ni Carmen Aglibut Tabon a taga Naguimba, Banayoyo a dua a tawen a nagtalinaed idiay King Fahd University Hospital ta naatake ken nadisgrasya iti uneg ti pagtaengan ti amo na idiay Riyadh, Saudi Arabia.
Nakaawid ni Tabon babaen iti tulong ti maysa a nurse a ni Romella Bayatin a taga- Lidlidda nga isu iti nangiyuman iti kasasaad ti OFW kadagiti maseknan nga opisyal, malaksid laeng ti Bombo Radyo Vigan a nangipakaammoan na kadagiti sabali pay a kasapulan ni Tabon.
Ni Bayatin iti kadua ni Tabon a nagawid ditoy pagilian ta isu ti pinusgan ti Overseas Workers Welfare Administration (OWWA) ken Philippine Consulate idiay Saudi Arabia a mangkuyog kenkuana ta saan a mabalin nga agmaymaysa nga agbiyahe ni Tabon ta saan a makabangon ken saan pay a makasao ta adda iti tubo iti tengnged na, sabali laeng iti tubo iti tiyan na.
Kabayatanna, napalaus met iti panagyaman iti pamilya ni Carmen ta nakaawiden ditoy Pilipinas ti kameng ti pamilya da tapnu isudan iti maka-ammo a mangasikaso kenkuana bayat iti panagpaimbag na.
