Saan pay a plano ti maysa nga Overseas Filipino Worker ti agpa-repatriate wenno agawid ditoy pagilian iti baet ti mapaspasaran tensyon idiay Israel.
Iti pannaki-uman ti Bombo Radyo Vigan ken ni Bombo International News Correspondent Ying Ursua Quinday, nataltalged ti kasasaadda idiay Jerusalem no ikumparar idiay Tel Aviv nga addan natay ken sumagmamano a nadunor.
Nabalakadanda laeng nga isaganada latta ti bagida no ibilinton ti Embahada ti emergency repatriation.
Idi Biernes ti pannakariknada dagiti adu nga airstrike ken missile isu nga agkarasublida met iti bomb shelter tunggal aguni ti siren.
Innayon ni Quinday a saan a nagkurang ti Israeli government para iti kinatalgedda ta nasapa ti panangpakaammoda kadagiti amin nga adda iti nasao a pagilian.
Gapu iti mapaspasaranda a tensyon ket awan pay laeng ti klase, maiparit ti ania man a gathering ken nakarikep amin nga store.
Nabalakadanda a saanda a rumuar ta nasken nga agtalinaedda laeng iti uneg ti pagtaenganda tapno saanda a maisagmak.
