VIGAN CITY – Binigbig ti local a gobiyerno ti Lidlidda nga idaulwan ni Mayor Atty. Sherwin Tomas ni Romella Bayatin, maysa a Filipina nurse idiay Saudi Arabia a kalugaran da nga isu iti nangikagumaan iti pannakaiyawid ni Carmen Aglibut Tabon a taga- Sitio Bay-asan, Naguimba, Banayoyo nga agdua tawen a nagtalinaed idiay King Fahd University Hospital ta naatake ken nadisgrasya iti uneg ti pagtaengan ti amo na idiay Riyadh, Saudi Arabia.
Boluntaryo a tinulungan ni Bayatin ni Tabon ta naasyan idi nakita na iti ospital ken kayat na a ditoy pagilian a makarecover.
Maipalagip a nagpatulong ni Bayatin ditoy Bombo Radyo Vigan tapnu maipakaammo kadagiti maseknan nga opisyal iti kasasaad ni Tabon idiay Saudi Arabia ket babaen iti daytoy, naidanun kadagiti kameng ti Department of Foreign Affairs ken Overseas Workers Welfare Administration (OWWA) iti kalikagum na.
Idi August 30 a nakaawid ditoy pagilian ni Tabon nga isu iti napalaus a pagyamyamanan dagiti kameng ti pamilya na.
