Plano ti Land Transportation Office (LTO) nga ipatungpal ti “No Plate, No Travel” policy ti Quezon City kadagiti tricycle iti intero a pagilian.
Maysa daytoy kadagiti addang tapno mapapigsa ti kampania kontra kadagiti kolorum ken saan a nairehistro a tricycle.
Segun iti National Confederation of Tricycle Operators and Drivers Association of the Philippines (NACTODAP), adda tallo a million ti tricycle units iti intero a pagilian, pakairamanan dagiti saan a nairehistro.
Maipalagip nga inrugi iti Quezon City idi Hulio 1 ti nasao a polisia, a nakatiliwan ken naka-ticketan dagiti limapulo a tricycle.
Umabot met iti P10,000 ti multa iti panagmaneho no saan a nakarehistro iti lugan.
Kabayatanna, nagpalagip ni LTO Law Enforcement Services executive director Francis Ray Almora, a napeggad no saan a nairehistro ti tricycle gapu ta awan ti insurance na.
