Nakagastosen iti nasurok P8 billion ti Commission on Elections (Comelec) iti agtultuloy a panagsaganada para iti umadanin a Barangay ken Sangguniang Kabataan Elections (BSKE).
Ti nasao nga eleksion ket nakaituding a maisayangkat iti umuna a lawas inton November 2026, ngem adda gakat a maisanud manen.
Segun ken ni Comelec Chair George Garcia, dakkel a paset ti pondo ti komisyon ti naipaayen iti panagsagana kadagiti election paraphernalia kas iti panag-imprenta ti balota.
Iti agdama ket adda nabatbati nga P11 billion a pondo nga inlatang ti komisyon kas honoraria kadagiti mangisursuro nga agserbi inton eleksion, pondo para iti training-da, ken maaramat iti deployment kadagiti alikamen.
Nakaituding a denggen iti Senado kadagiti sumarsaruno a bulan ti gakat a panangisanud ti BSKE 2026, ken segun ken ni Garcia, sumango isuna iti nasao a panagdenggeg tapno ibingay ken ilanad ti kinasagana ti komisyon.
Kinunana nga agingga saan a makanselar ti eleksion ket agtultuloy iti panagsagana ti komisyon karamanen ti panangbukel iti sumagmamano a contingency measures.
