VIGAN CITY – Inkalin dagiti kameng ti Provincial Quarantine Office babaen iti panangidaulo ni Provincial Quarantine Officer Martel Quitoriano dagiti dua a tonelada ti pork siomai a nasalamaanda idi January 19 iti quarantine checkpoint idiay Brgy. Bio, Tagudin.
Nakailanad iti permit nga iggem ti nagmaneho iti van a ni Meldrick Baptista, agtawen ti tallo pulo ket maysa nga agnaed idiay Balacad, Laoag City, Ilocos Norte a beef siomai ti inkargana ngem idi linukatan dagiti kameng ti quarantine office ket nakita da a pork siomai iti karga na.
Mapapati a saan nga ammo ti drayber a saan a sabali iti karga na isu a mapapa-ayaban dagiti akinkukua ti nasao a produkto tapno mailawlawagda no apay a nagipastrekda kadagiti kontrabando ditoy probinsia.
Natalged man wennu saan ket masapul a maikali dagiti nasao a produkto tapnu saan a makastrek ditoy probinsiya ti African Swine Fever virus.
Malaksid iti pannakaikali dagiti nasao a produkto, nagmuwelta ti driver ti sangapulo ribo a pisos gapu iti panagikot na iti tampered a dokumento.
