Immanamong ni Surigao del Norte Rep. Robert Ace Barbers ken ni Davao City Rep. Paolo Duterte a maimbestigaran dagiti adda iti narco list, ngem umuna a masapul a ma-verify ti listaan tapno masigurado a saan a naaramat iti politika.
Segun kenni Barbers, lead presiding officer ti House quad committee, adda tallo a narco lists: ti listaan ni dati a Presidente Rodrigo Duterte, ti listaan ti PDEA, ken sabali pay a saan a nalawag ti nagtaudanna.
Inrekomendar ti quad committee iti PDEA nga i-validate dagiti listaan gapu ta adda dagiti nagan a mabalin a naaramat iti politika.
Kinuna ni Barbers nga adda dagiti nagan iti listaan ni Duterte a saan pay a na-verify wenno na-validate ken addaan iti political motivation, kas iti kaso da dati a Mayor Jed Mabilog ken General Wesley Barayuga.
Kabayatanna, nakasaganan ni Duterte a dumalan iti imbestigasion ngem nasken a saan a maibasar iti hearsay, kas iti testimonia ni dati nga opisial ti Customs a ni Jimmy Guban.
Nagpanawagan pay ni Duterte ti imbestigasion dagiti adda iti narco list, pakairamanan dagiti kameng ti Kongreso nga addaan iti pakairamananna iti droga.
