Tallo ti nadunor iti panagsinnagid iti nakabisikleta ken nakamotorsiklo idiay Barangay Bigbiga, Santiago, Ilocos Sur.
Ti nagbisikleta ket lalaki nga agtawen-iti-limapulo ket dua, naasawaan, construction worker nga agnaed idiay Barangay Busel-busel, Santiago.
Ti nagmaneho met iti color black aerox 155 ket lalaki nga agtawen-iti-duapulo ket tallo, awanan trabaho, nga agnaed idiay Barangay Dan-ar, Santiago, ken backrider-na nga agtawen-iti-sangapulo ket siam nga agnaed idiay Barangay Caterman, Candon City.
Iti pannaki-uman ti Bombo Radyo Vigan ken ni PSSG. Suerte Barbero iti Santiago Municipal Police Station, agpada nga agpa-amianan a direksyon dagiti dua idin ta idi ag-overtake koma iti nakamotorsiklo ngem isu metten iti kellaat a panagpatingnga iti kalsada ti nakabisikleta isu a nagsinnagidda ken naawananda iti kontrol.
Segun ken ni Barbero, dunor iti ulo ti sinagaba ti nakabisikleta idinto a slight injuries laeng dagiti nagkalubbon iti motorsiklo isu a naipanda iti Candon General Hospital para iti pannakatamingda ket iti agdama, natalgeden iti kasasaadda.
Addan iti inisyal a nagpatangan dagiti karaman iti aksidente para iti magastos iti nakabisikleta a nakarkaru iti sinagabana.
