VIGAN CITY – Binalakadan iti Ninoy Aquino International Airport (NAIA) dagiti agbibiahe nga agusar iti facemask kas panagannad kontra iti baro a virus nga agwaras manipud Japan.
Segun ken ni Manila International Airport Authority (MIAA) spokesperson Chris Bendijo a naipaskil iti airport dagiti advisory nga agusarda dagiti tattao iti facemask, ag-sanitize ti ima, ken abbongan ti ngiwat ken agong no aguyek.
Sumangsango ita ti Japan iti serious outbreak a streptococcal toxic shock syndrome (STSS), nga inladawan ti Centers for Disease Control and Prevention kas uncommon ngem severe bacterial infection a mabalin a life-threatening.
Manipud idi June 2, agarup 977 a kaso ti STSS ti nairekord idiay Japan.
Karaman kadagiti early symptoms ket ti panaggurigor, panaglammin, muscle aches, panagulaw ken panagbakwar.
Innayon pay ni Bendijo a makikamkammayetdan iti Department of Health (DoH) babaen ti Bureau of Quarantine (BoQ) mainaig iti pannakamonitor dagiti pasahero a sumangpet manipud sabali a pagilian.
Inyunay-unay na a rekomendasion laeng ti panagusar iti facemask iti airport ken saan pay a naideklara a mandatory.
Iti agdama, saan pay laeng nga ibilang ti DOH ti STSS kas public health concern.
Nupay kasta, impaganetget ti departamento ti pannakapainget iti public awareness ken preventive measures kadagiti kadagiti sakit a water-borne ken influenza-like illnesses, leptospirosis, ken dengue.
