VIGAN CITY – Dead on arrival idiay ospital ni Alex Lagmay, agtawen ti uppat a pulo ket lima, nasawaan, dati a kameng ti Philippine National Police ngem na-dismiss iti serbisyo ken agnaed idiay Poblacion Este, Sta. Cruz ta pinaltogan dagiti saan pay nabigbig a suspek idi alas dose kwarenta y singko ti malem idi kalman, January 5.
Maibasar iti inisyal nga imbestigasyon dagiti otoridad, magmagna nga agawid iti pagtaengan da ni Lagmay idi adda immasideg kenkuana a saan a nabigbig a suspek ket pinalto-paltoganda iti manmin-ano a daras.
Naitaray idiay Ilocos Sur District Hospital- Sta. Lucia ti biktima para iti pannakatamingna ngem saanen a naisalbar pay iti biyag na.
Ti agdama, manarimaan pay laeng iti imbestigasyon dagiti otoridad iti nasao a pasamak tapnu maamuan iti kinatao ken motibo dagiti suspek.
