VIGAN CITY- Saan a planado ti pannakaikkat ni Davao Representative Pantaleon Alvarez a house speaker no di ket napunuanen dagiti agpanpanday linteg ta kayat da ti panagbalbaliw, dayta ti inlawlawag ni dati a Manila Mayor ken agdama a Buhay Partylist Rep. Lito Atienza inaig iti panagsukat ti liderato idiay kamara ta nabotosan ni Pampanga Rep. Gloria Macapagal Arroyo kas house speaker.
Ti pannakiuman ti Bombo Radyo Vigan kenni Rep. Atienza, inpakaammo na nga inruar dagiti agpanpanday linteg ti sakit ti nakem da ta napanuanen dan isu a saan dan a nalapdan nga ibuksilan ti kayat da nga isu ti panangsukat ti liderato ti kamara.
Respetaren met ti kamara no saan a kayat ni Ilocos Norte Representative Rodolfo Fariñas ti agtalinaed a house majority leader ta maawatan da a nasinged da kenni Alvarez nupay isu ti kayat dagiti agpanpanday linteg nga agtalinaed a majority leader ta epektibo ti pangidaulo na.
Kabayatanna, inbuksilan ni Bayan Muna Partylist Rep. Carlos Isagani Zarate nga awan ti namnamaen ti Makabayan bloc a panagbalbaliw uray no nasukatan ti liderato ti kamara ta agtultuloy ti panangiduron ti mayorya iti nangatngato a buwis kadagiti kangrunaan a magatang ken charter change nga isu idi ti ilablaban ni Arroyo idi isu pay laeng ti presidente ket patien na pay a planado ti panagsukat ti liderato ta saan a mapasamak dayta no saan nga ammo ken suportado ti malacanang nangruna ket kaalyado ti dati a presidente iti agdama a presidente.
