Maisingsingasing iti Kamara ti gakat a mangted ti nayon a P18, 000 a sweldo dagiti doktor nga agtar-tarabaho kadagiti public hospital ken maikkatan ti oras ti trabaho dagiti nurse.
Iti House Bill 3520 nga isingsingasing ni Quezon City Rep. Patrick Michael Vargas, agbalin P91,306 ti entry level iti sweldo dagiti government medical doctor manipud iti agdama a P73, 303 no maipasa ti gakat.
Pinasingkedan ni Vargas a ti agdama a sweldo dagiti government doctor ket saan a naan-anay iti rigat ti trabaho ken pangta a sangsangoen da, kangrunaan no adda public health emergencies kas ti napalabas a pandemya.
Gagem ti gakat a lapdan dagiti doktor a mapan iti sabali a pagilian tapno agtrabaho a nangatngato ti sweldo no ikumpara iti agdama a maaw-awat dituy pagilian.
