Madanagan ti Kamara iti kasla kadarato nga insidente ti kinaranggas iti uneg kadagiti pagadalan.
Pinasingkedan ni Akbayan party-list Rep. Perci Cendaña a sobra a makapadanag ken nakabutbuteng ti kadarato nga insidente ti kinaranggas iti pagadalan.
Daytoy ket kasaruno iti napasamak a shooting incident iti Banga National High School idiay South Cotabato no sadino tallo ti kumpirmado a natay, ken saan a bumaba iti sangapulo ti nadunor.
Daytoyen ti maikatlo a shooting incident a napasamak iti pagilian manipud idi June 22, immuna idiay San Jose National High School, Tacloban City no sadino tallo nga estudyante ti natay.
Idi Agosto 18, dua met ti natay iti napasamak a pammaltog idiay Ateneo de Zamboanga University.
Gapu daytoy, immapela ni Cendaña iti liderato ti Kongreso nga ipasa dan ti gakat da nga iparitan dagiti menor de edad a maaddaan ti access iti paltog ken ideklarar a gun-free-zone ti amin a pagadalan iti pagilian.
