VIGAN CITY – Sapsapulen pay laeng dagiti kameng ti Candon City police station ti menor de edad a nangserrek ken nagtakaw iti store ni Antonieta Capones Galanga nga agtawen ti innem a pulo ket dua, naasawaan idiay Sitio Turod, Barangay Tablac, Candon City idi kalman.
Maibasar iti inisyal a panagsukimat dagiti pannakabagi ti linteg, idi linukatan ti biktima iti paglakoan na, naduktalan na a mapukpukawen ti sumurok-kumurang sangapulo ribo a pisos a naglakoan na.
Mapapati a ti akin-likud nga arwangan iti pagtagilakoan iti simrekan ti suspek agsipud ta nakita dagiti pannakabagi ti linteg a napursaran a nalukatan iti door knob na.
Kinumpirmaran ni Police Lt. Col. David Dulnuan, hepe ti Candon City police station, a ti suspek ket siguden nga adda kaso na a panagtakawan iti nasao a syudad.
