Nadundunor iti menor de edad a nagmaneho iti motorsiklo gapu iti pannaka-aksidentena iti Barangay Road idiay Barangay Cabaroan, Sta. Catalina, Ilocos Sur iti agsapa idi kalman, January 1, 2026.
Ti nagmaneho ti Suzuki Raider 150 ket agtawen-iti-sangapulo ket pito, awanan iti driver’s license nga agnaed idiay Barangay Poblacion, Sta. Catalina.
Nakaawat dagiti kameng ti Sta. Catalina Municipal Police Station iti report manipod iti Rural Health Unit personnel a nangipakaammo nga adda napasamak nga aksidente iti nasao a lugar isu a nagrespondeda ngem idi nakadanonda ket naipanen ti menor de edad iti Ilocos Sur Provincial Hospital – Gabriela Silang.
Naammoan nga agpapabagatan a direksyon ti driver idi nadanonna iti kurbada a paset iti kalsada ket awanan ti kontrol ti driver iti manibelana isu a naidarusdus iti pavement a gappuanan iti pannakadunorna iti agduduma a paset ti bagina.
