VIGAN CITY – Naisakup iti extreme enhanced community quarantine ti Brgy. Poblacion, La Paz, Abra kalpasan nga adda manen iti maika-uppat a positibo a kaso ti COVID19 iti nasao a probinsia.
Ti pasyente ket maysa a frontliner iti Seares Memorial Hospital, agtawen ti tallopulo ket dua, awanan ti sintomas ngem addaan ti angkit, awan ti travel history-na iti sabali a lugar ken agdama a naka-quarantine iti nasao nga ospital.
Naduktalan a positibo ti pasyente babaen iti naisayangkat a COVID19 Risk Based Testing kadagiti frontline personnel ken dagiti vulnerable population.
No pay kasta, nai-lockdown payen ti ospital a pagub-ubraanna ken kiniddaw ni Gov. Joy Bernos a makitinnulong dagiti pasyente a nakapulapolna para iti contact tracing ken nabalakadan dagiti umili nga agridam tatta a panawen ti COVID19.
