VIGAN CITY – Pimmusay ti maysa a lalaki ta pinaltogan ti dua a suspek a saan pay a nabigbig idiay Liberty Sayaan Sari-Sari Store, Brgy. Poblacion Norte, Lidlidda.
Nabigbig ti biktima a ni Mark Anthony Sayaan agtawen tallo pulo ket pito, mannalon agnaed ti nasao a barangay.
Basar ti report manipod Lidlidda Municipal Police Station, dua a lallaki iti napan ti sari-sari storeda ket gimmatangda iti dua a botelya ti beer ken nagsaludsud dagiti suspek no adda iti drug lord ti nasao a lugar ken nagpaamammuda a kameng ti INTEL.
Pinaturunganda iti paltog ni Liberty Sayaan, asawa ti biktima ken simbrekda ti tienda.
Rimmuar ni Mark Anthony manipod ti maysa a ruangan ngem pinaltogan dagiti dua a suspek iti namin ado a daras.
Innala dagiti dua a suspek ti kwarta a pito ribo a pisos ken alahas nga aggatad ti pito pulo ket uppat a ribo a pisos ken dua a cellphone nga aggatad ti sangapulo ket walo a ribo a pisos.
Naipan ni Sayaan idiay Candon General Hospital ngem naideklara a dead on arrival.
