Natayen ti maysa a mangisursuro idi nasarakan ti kabsatna iti uneg iti kuartona idiay Barangay Poblacion Sur, Sta. Maria, Ilocos Sur itay alas onse iti bigat, September 29, 2024.
Ti biktima ket ni Melchor Delizo Escobar, agtawen iti limapulo ket maysa, naasawaan nga agnaed idiay Barangay Poblacion Sur, Sta. Maria.
Iti pannaki-uman ti Bombo Radyo Vigan ken ni PMaj. Macario Dulawan Jr. a Chief of Police iti Sta. Maria Police Station, nakaawatda iti pakaammo inaig iti pannakasarakda a natay ni Delizo iti pagtaenganda iti nasao a barangay isu a nagresponde dagiti kameng ti Sta. Maria Police Station.
Segun ken ni Dulawan, pinasingkedan ti kabsat ti biktima a ni Natalia Estrelita Delizo, agtawen iti limapulo ket walo nga agnaed met laeng iti nasao a lugar nga idi alas syete itay bigat ket napansinna a saan pay a nakariing ti kabsatna isu a napanna pinagunyan iti kuartona ngem saan a simmungbat ket idi nadanon iti alas nuebe iti bigat ket napan manen nagtugtog ngem saan a simmungbat isu a smmirip iti tawa ti nasao a kuarto ket nakitana ti biktima a nakaparintumeng iti datar bayat a nakapakleb iti akin-ngato a paset iti bagina iti pagiddaanna.
Nagpaarayat ti kabsat ti biktima iti karrubada isu a pwenersada a linukatan ti kuarto ket isun ti pannakakitada iti bangkay.
Naamoan manipod iti kabagyan ti biktima nga adda history ti biktima iti heart attack.
Mayur-uray ti pangngeddeng iti pamilia ti biktima nu kayatda nga ipa-autopsy ti biktima tapno maamoan nu adda sabali a rason ti nakatayanna.
VIDEO – PMAJ MACARIO DULAWAN JR
