Nangiruar ti Malakanyang ti Memorandum Circular No. 133 a mangibil-bilin ti alternative work arrangements kadagiti pagopisinaan ti gobierno iti sangapulo ket lima a probinsia iti Luzon.
Karaman kadagiti sakop ti Ilocos Sur, Ilocos Norte, La Union, Pangasinan, Abra, Benguet, Kalinga, Mountain Province, Apayao, Batanes, Nueva Vizcaya, Zambales, Tarlac, Pampanga ken Bataan.
Kabayatanna, ipatungpal dagiti pampubliko ken pribado a pagadalan kadagiti nadakamat a lugar ti alternative learning modes ken learning continuity measures iti amin a lebel, kalaksidan no adda sabali a bilin dagiti local chief executives da.
Segun iti Malakanyang, naisayangkat ti addang kasaruno ti rekomendasion ti National Disaster Risk Reduction and Management Council wenno NDRRMC gapu iti manamnama a napigsa a panagtudo a mabalin a mangitunda ti panaglayus ken problema iti trapiko.
Nupay kasta, agtultuloy ti operasion dagiti ahensia a mangted ti basic ken health services, disaster preparedness and response, ken dadduma pay a napapateg a serbisio.
Para met kadagiti pribado a sektor, adda iti opisina ti tunggal kompania ti decision no suspensoen da ti trabaho wenno mangipatungpal ti alternative work arrangements.
