VIGAN CITY – Makatawen iti pannakaibalud ken mamuelta dagiti aglabsing iti pagannurotan kabayatan iti lockdown idiay Amman, Jordan kas pinasingkedan ni Bombo International Correspondent Lanie Velasco, maysa a caregiver a taga- Burgos, Ilocos Sur.
Segun ken ni Velasco, kaaduan tatta kadakuada nga nga OFW ket “no work, no pay” ken kunana nga adun dagiti natiliw dagiti pulis iti nasao a pagilian nga aglablabsing kadagiti pagannurotan ta kanayon iti panaglikmotda iti lugar no dumteng iti oras ti alas sais iti rabii ta rumbeng koman nga addadan iti uneg ti pagtaenganda.
Kabayatanna, adda met ti tulong a naaw-awatdan a naggapu iti Philippine Overseas Labor Office ken iti Overseas Workers Welfare Administration ngem kunana a napaliiwna a dagiti am-ammo dagiti opisial ti maipangpangruna.
Iti agdama, siam a pulo ket siam ti aktibo a kaso ti COVID19 iti nasao a pagilian ken pito dagiti natay.
