Naipila iti maikatlo koma nga impeachment complaint kontra ken ni Pres. Ferdinand Marcos Jr. ngem saan nga inawat ti Office of the Secretary General ta adda idiay Taiwan ni Secretary General Cheloy Garafil.
Karaman dagiti complainant da dati a Congressman Mike Defensor ken Jing Paras, da Atty. Ferdinand Topacio ken dati nga Ilocos Sur Governor Chavit Singson, dati a NICA Chief Hermogenes Esperon ken dadduma pay.
Segun ken ni Defensor, agtaripnongda manen tapno mapagpapatangan iti sumaruno nga addangda ta arigna awanen ti serbina nga agsublida iti sumaruno a lawas.
Dayta ket gapu iti panagsubli ti session inton sumaruno a lawas ket posible nga insigida a mairaman iti order of business ti umuna nga impeachment complaint kontra ken ni Pres. Marcos Jr. nga impila ni Atty. Andre de Jesus ken inendorso ni Pusong Pinoy Rep. Jernie Jett Nisay.
