Posible a masuspenso wenno maibabawi ti driver’s licenses ti aktor a ni Derek Ramsay ken gayyemna a ni Anthony Jude Violago gapu iti mapapati a panagaramat iti saan nga otorisado a plaka iti maysa a luxury sports car.
Segun ti Land Transportation Office (LTO), nangrugi iti imbestigasyon kalpasan a makita dagiti kamengda iti social media ti maysa a Porsche 918 Spyder nga adda plaka a saan a maipada iti opisyal a nakarehistro.
Ti lugan ket nakarehistro ken ni Derek Ramsay.
Segun ken ni LTO Chief Assistant Secretary Markus Lacanilao, mapapati a ni Violago ti nangisukat ti plaka tapno maipada iti initials-na nga AJV.
Mapapati a naaramid dayta bayat a maar-aramat ti luxury car nga agturong iti maysa nga event.
Kinuna ti LTO a madi ken maiparit ti panagsukat wenno panagaramat iti sabali a plaka ta baliwanna dayta iti identity iti lugan.
Insuko ni Ramsay ti Porsche nga ita ket nakakustodiyan iti LTO bayat nga agtultuloy iti imbestigasion ken insuko ni Violago ti driver’s license-na.
Agpada a nagkiddaw ti pammakawan da Ramsay ken Violago ken inaminda iti kamalida.
