Pinasingkedan ti Land Transportation Office (LTO) a kemmegenda dagiti motorista nga agar-aramat ti improvised wenno replica a plaka kadagiti luganda nga awan ti mayannatup nga otorisasyon mangrugi inton September 1.
Nagballaag ni LTO Chief Assistant Secretary Markus Lacanilao a saan a kunsinteren ti ahensia dagiti nasao a klase iti panaglabsing iti kalsada.
Karaman pay iti crackdown ti sumagmamano a manufacturer iti improvised plates kagiddan a kidkiddawen ti ahensia a leppasen ti illegal nga aramid.
Naammoan iti LTO a ni Derek Ramsay ket sumangsango iti posible a suspension ken pannakababawi ti lisensyana nga agmaneho.
Insuko ni Ramsay ti luxury car-na a mapapati nga addaan iti peke a plaka iti LTO kalpasan iti hit-and-run idiay Antipolo City iti dua a babai a gappuanan ti pannakadunorda.
