
Makipagkita ni Transportation Secretary Vince Dizon kadagiti grupo ti transportasion inton sumaruno a lawas tapno pagsaritaanda dagiti reklamoda ken dadduma pay nga isyu iti sektor ti transportasion.
Segun ken ni Dizon, awan ti kontraenna iti dua nga aldaw a welga a plano ti grupo ti Manibela inton Nobiembre 23 ken 24 gapu ta karbenganda ti agprotesta.
Konkontraen ti Manibela ti posible a pannakaikkat ti hepe ti Land Transportation Office (LTO) Assistant Secretary Markuz Lacanilao, a dinayawda gapu iti reporma ken pannakapasayaat ti serbisio iti nasao nga ahensia.
Indagadag ni Dizon nga urayen ti publiko ti pormal nga anunsio ti Opisina ti Presidente maipapan iti posible a pannakasukat ni Lacanilao gapu ta awan pay ti maudi a desision mainaig iti puestona.










