Nakaruaren iti ospital ti nagmaneho iti motorisklo kalpasan a na-hit-and-run babaen ti maysa nga L300 van iti McArthur Highway corner Alvaro Street idiay Brgy. San Isidro, Candon City, Ilocos Sur idi July 19, 2026.
Ti nagmaneho iti red Honda Beat motorcycle ket babai nga agtawen iti tallopulo ket dua, awanan trabaho nga agnaed idiay Barangay Caterman, Candon City idinto a ti akin-kukua iti L300 van a puraw ket agnaed idiay Bulacan.
Iti pannaki-uman ti Bombo Radyo Vigan ken ni PLt. Jovelyn Antalan iti Candon City Police Station, bayat ti panagturong iti amianan a direksyon ti nakamotorsiklo ken agsikko koma iti kannigid a sumrek iti Alvaro Street idin kellaat lattan a tinukbob isuna ti L300 van a gappuanan iti pannakaideretsona iti bangir a paset ti kalsada.
Segun ken ni Antalan, immunan a pinasingkedan ti driver ti motorsiklo a maysa a black Sedan iti nangdungpar kenkuana ngem iti imbestigasyon dagiti otoridad ken panag-back tracking kadagiti CCTV ket naduktalanda a maysa nga L300 van iti nangdungpar kenkuana.
Kinuna ni Antalan a babaen ti pannakikammayetda iti Land Transportation Office (LTO) ket nabigbigda iti akin-kukua ti lugan ngem manarimaan pay laeng iti panangbigbig no siasino iti nangmaneho dayta idi napasamak iti aksidente.
Gapu iti aksidente ket nagsagaba iti dunor iti agduduma a paset ti bagi ti driver ti motorsiklo nga insigida a naipan iti Candon City Hospital babaen kadagiti concerned citizen ket iti agdama, natalgeden iti kasasaadna.
No kas bilang saan a sangwen ti driver ti L300 van iti basolna ket mapilaan iti kaso a Reckless Imprudence Resulting in Damage to Property and Physical Injury.
