Pinermaanen ni Presidente Ferdinand Marcos Jr ti Republic Act No 12160, baro a linteg a ti gagemna ket masigurado ti naurnos ken nasapa a pannakaitabon dagiti matay a Muslim, kas maisurot iti Islamic rites.
Babaen iti linteg, dagiti bangkay ti Muslim ket nasken a maitabon iti kabiitan a panawen uray awan pay ti death certificate-na iti panawen ti pannakaitabonna, tapno idayaw ti pammati ti Islam a ti pannakaitabon ket maaramid sakbay ti kararag.
Karaman iti probisyon ti linteg a dagus a mairuar ti bangkay iti uneg ti duapulo ket uppat nga oras manipud kadagiti ospital, clinic, punerarya, morgue, pagbaludan, wenno dadduma pay a kustodia ti bangkay.
Ti bangkay ket nasken a mabungon iti puraw a tela ken maikabil iti maysa nga airtight ken leak-proof a cadaver bag wenno karton a kayo ken maselyuan ti tape wenno benda.
