VIGAN CITY – Addan idiay Provincial Jail ni Richard Toquero nga agtawen ti tallo pulo ket lima, construction worker, drug surrenderee nga agnaed idiay Patpata, Candon City a mapapati a lider ti Toquero group a konektado iti operasyon iti iligal a droga, gun running ken gun for hire activities ditoy probinsiya a nakemmeg dagiti kameng ti Criminal Investigation and Detection Group- Ilocos Sur nga idaulwan ni Police Major Millenium Bantas kadua na dagiti naduma-duma a yunit ti Philippine National Police kas ti Provincial Intelligence Branch – Ilocos Sur Police Provincial Office, Regional mobile force battalion 2nd manuever company , Galimuyod PNP ken Candon City PNP.
Ti pannakakemmeg ni Toquero ket babaen iti bileg ti warrant of arrest nga inparuwar ni Judge Magnolia Cayetano, executive judge, Regional Trial Court Branch 56, San Carlos City, Pangasinan inaig kadagiti kaso a sangsangwen na a kas pinasingkedan ni P/Lt. Col. David Dulnuan, hepe ti Candon City police station
Naala kenkuana ti pito a bala ti caliber 45, lima a bala ti caliber 9 mm, dua a bala ti gauge 12 shotgun ken magazine ti caliber 45.
Malaksid ti bala dagiti naduma-duma a klase ti paltog ken magazine, naala pay dagiti otoridad nga ikot ti suspek ti maysa a pouch brown a naglaon ti plastic sachet nga adda karga na a dua a heat sealed transparent plastic sachet a naglaon iti mapapati a shabu ken nakarolyo nga aluminum foil.
Naibalud idin ti suspek ti dua a tawen inaig met laeng ti iligal a droga ngem nakaruar met laeng ta nakapagpiyansa.
