Natay iti pammaltog ti maysa a lalaki ta pinatay dagiti agama iti mismo a pagtaenganda idiay Pussuac, Sto. Domingo, Ilocos Sur itay alas dies iti bigat, February 19, 2025.
Ti biktima ket nabigbig a ni Dionisio Doquez, agtawen iti uppat a pulo, addaan ti live-in partner nga agnaed idiay Barangay Parada, Sto. Domingo idinto a dagiti suspek ket da Vincent Pascua ken amana a ni George Pascua nga agpada nga agnaed idiay Barangay Pussuac, Sto. Domingo.
Iti pannaki-uman ti Bombo Radyo Vigan ken ni PLt. Roger Retreta nga Officer-in-Charge iti Sto. Domingo Municipal Police Station, kadua ti biktima ti live-in partner-na a napan iti pagtaengan dagiti suspek tapno singiren ida iti pak-pakauna a bayad ti water pump a P10,000 idin pinaltogan isuna ti suspek a ni Vincent iti mamin-adua a daras a gappuanan ti pannakatama ti tengngedna.
Segun ken ni Retreta, ti generator nga impalako dagiti suspek iti biktima ket tinakawda idi napan a bulan ket gapu ta ti nakailakoan ti biktima ket kalugaran ti nagtakawan dagiti suspek ket natakuatan ti Magsingal PNP iti inaramidda isu a napagtutulagan a bayadanda laengen iti natakaw isu a napan nagsingir ngem isu metten ti pannakapaltogna.
Gapu ti buteng ti live-in partner ti biktima ket pimmanaw iti crime scene isu a naikkan gundaway dagiti suspek ket idi awanen ti biag ti ti biktima ket binalkotda iti tolda ken sako, sada impan iti kabakiran idiay Paing, Bantay usar ti kurong-kurong.
Nupay kasta, apaman a naipanda ti bangkay idiay Bantay ket immuna a nakemmeg ti ama a suspek ta nakita dagiti otoridad iti panangbuggona ti kurong-kurong idinto a simmuko ti putotna nga isu iti nangitudo iti ayan ti biktima.
VIDEO – PLT ROGER RETRETA
