VIGAN CITY- Nakaro a bartek ken pannakasair ti rikna gapu ti nagduma a relihiyon ti mapapati a rason nu apay a binagkong ken pinatay ni Jayvin Biste nga agtawen iti uppat a pulo ket dua, tricycle driver ken agnaed idiay Sitio Nagtupacan, Bangbangar, Bangued, Abra ni James Gumpad Tapec nga agtawen iti innem a pulo, construction worker ken agnaed idiay Barangay North Poblacion, San Juan, Abra idi parbangon ti February 8.
Segun ken ni Police Chief Inspector Dominador De Guzman, hepe ti Bangued PNP, nakemmeg ti suspek ni Biste iti likod ti Abra Valley Hotel idiay Calaba, Bangued, Abra idi nangiwayat da ti hot pursuit operation ket inaklon na ti panangbagkong na ti biktima a kinasango na pay a naginom sakbay ti pasamak.
Nabigbig met ti kinatao ti biktima idi nagbalaw dagiti kameng ti pamilya na a saan a nagawid idi rabii ti February 7 ken nadamag da nga adda ti biktima ti pammagkong idiay Bangued, Abra ket idi napan da kinita iti punerarya, positibo a binigbig da nga isu ti kameng ti pamilya da ti biktima.
