Nakemmeg ti maysa a lalaki gapu iti panangbagkongna iti maysa met la a lalaki idiay Barangay Tabucolan, Santa, Ilocos Sur idi rabii, April 4, 2026.
Ti suspek ket agtawen iti uppat a pulo ket siam, naasawaan, welder nga agnaed idiay Barangay Tabucolan, Santa idinto a ti biktima ket agtawen iti duapulo ket lima, baro, construction worker nga agnaed idiay Barangay Tabucolan, Santa.
Nakaawat ti Santa Municipal Police Station ti pakaammo maipanggep ti pammagkong a napasamak iti nasao a lugar isu a nagrespondeda.
Naammoan a sakbay iti insidente, agin-inom ti suspek ken biktima iti pagtaengan ti maysa nga Earth Asia.
Idi pumanaw koman ti biktima ket kellaat lattan nga inasot ti suspek ti insukibotna a kutsilyo ket binagkongna ti biktima iti mamindua a daras a gappuanan ti pannakatama iti tiyan ken takyagna.
Naipan ti biktima iti Ilocos Sur Provincial Hospital – Gabriela Silang, Tamag, Vigan City para iti pannakatamingna idinto a nakemmeg ti suspek iti naisayangkat a hot pursuit operation.
Iti agdama ket agtaltalinaed ti suspek iti Santa Municipal Police Station tapno dumalan iti husto a proseso.
Saan met a narekubre ti kutsilyo a naaramat iti krimen ket mapapati nga inbansag ti suspek iti baybay nga asideg laeng iti pagtaenganda.
