VIGAN CITY – Nakemmeg dagiti aguliteg gapu iti pammagkong ken panagpaputok iti iskupeta idiay Barangay Paratong, Narvacan, Ilocos Sur.
Nabigbig ti suspek iti pammagkong a ni Edmar Montero Susa, agtawen iti uppat a pulo ket uppat idinto a ti biktima ket ti kasinsinna a ni Reynaldo Montero Quias, agtawen iti limapulo, agpada nga agnaed iti nasao a lugar.
Ti met nagpaputok iti iskupeta ket ni Darryl Montero Quias, agtawen iti duapulo, agnaed iti nasao a lugar.
Iti pannaki-uman ti Bombo Radyo Vigan ken ni Police Major Alexander Dangli iti Narvacan Police Station, agin-inom ti suspek ken biktima idin ta rimsua ti saanda a pagkinnaawatan ket nagawid ti suspek ngem idi agsubli ket nakaiggemen iti kutsilyo.
Nagtultuloy ti ririda agingga a binagkong ti suspek ti likod ti tengnged ken akin-kannigid a pungwa-pungwan ti biktima.
Inanawa met ida dagiti kabagyanda ket idi mayawid ti suspek, napan ti putot ti biktima a ni Darryl iti pagtaengan ti suspek a nagpaputok iti air gun a nakapuntaan iti saka ti putot ti suspek a ni Edmar Montero Susa.
Nagresponde dagiti pannakabagi ti linteg ket nakemmeg dagiti dua a suspek ken nakumpiskar ti air gun a naaramat idinto a masapsapul pay laeng ti patadem a nausar iti pammagkong.
Datin nga adda susik iti nagbaetan ti biktima ken suspek iti pammagkong.
Nupay kasta, maipila ti kaso a frustrated homicide kadagiti dua a suspek.
