Natalgeden ti kasasaad ti biktima iti pammagkong idiay Barangay Purok a Bassit, Vigan City, Ilocos Sur.
Ti biktima ket maysa a construction worker, agnaed iti nasao a lugar idinto a ti suspek ket kalugaran met laeng ti biktima.
Iti pannaki-uman ti Bombo Radyo Vigan ken ni PLTCOL. David Dulnuan, adda bassit laeng saan a nagkinnaawatan ti suspek ken ti biktima nga agpada a nakainom isu a napasamak ti pammagkong.
Maipalagip a magmagna ti biktima iti eskinita idi agawid ngem sinurot ti suspek nga isu ti gundaway a panangbagkongna.
Nagsagrap iti dunor ti pammagkong ti biktima nangruna iti kannawan a takyagna ken paset iti lapayag.
Narekobre manipud iti nakapasamakan ti insidente ti kutsilyo nga agrukod iti 33 cm agraman apputanna.
Daan a susik ti madakdakamat a rason ti pammagkong ngem saanen a naibutaktak no ania daytoy a saanda a nagkinnaawatan idi kallabes.
Dagus met a nakemmeg ti suspek nga ita ket mapilaan iti kaso.
