VIGAN CITY – Kaso a Theft ken panaglabsing ti Section 11 iti Republic Act 9165 ti sangwen ti nakemmeg a ni Kevin Idica Vergara, agtawen iti tallopulo, baro, tricycle driver nga agnaed idiay No. 1195, Ortiga Street, Tondo, Manila idinto a nakalibas dagiti kakaduana a nag-Salisi iti Tagudin Yellow Public Market, Barangay Del Pilar, Tagudin, Ilocos Sur iti oras ti alas singko singkwentay singko iti malem idi kalman, August 4, 2024.
Ti biktima ket ni Maggie Lomboy Leal, agtawen iti uppat a pulo ket uppat, naasawaan, meat vendor ken agnaed idiay Barangay Las-ud, Tagudin, Ilocos Sur.
Segun ti PNP, ti biktima ket agilaklako ti karne idin napan ti saan a nabigbig a babai a suspek a gimmatang ti karne nga isun ti panag-gundaway ni Vergara ta innalana ti black shoulder bag ti biktima a naglaon ti nasurok-kumurang P100,000 a kuarta a naipan iti sirok iti tugaw.
Napansin met ti kadua ti biktima nga aglaklako a naala ti bag isu nga impakaammona iti biktima ken timmawag iti Tagudin Police Station a gappuanan ti pannakakemmeg ti suspek ken nakarekubrean ti nasao a natakaw a bag idinto a nakalibas ti babai a suspek ken dadduma pay a kakaduada ta namaneharda ti naglugan iti gray Toyota Innova sada naglibas.
Nakikammayeten ti Tagudin Municipal Police Station kadagiti kaasidegda a police stations ken nangisayangkat ti hot pursuit operation para ti pannakakemmeg dagiti nakalibas a suspek.
Naala manipod ti suspek ti maysa a heat-sealed transparent plastic sachet a naglaon ti white crystalline substance ti mapapati a shabu nga agdagsen ti 0.2 a gramo ken aggatad ti P1,360 idinto a ti naala pay a non-drug evidence ket maysa a red Samsonite belt bag containing face mask, siam a piraso ti barya, 1,000 ken 50-peso paper bill, maysa a tactical knife ken ballpen; maysa a brown a wallet a naglaon ti maysa a piraso ti 1,000 ken 20-peso bill; ken maysa a bassit a karton a naglaon ti dua a saan a naaramat nga aluminum foil ken maysa a lighter.
