Kaso a panaglabsing ti Republic Act 10591 wenno Illegal Possession of Firearms ken Omnibus Election Code iti sangwen ti maysa a lalaki a natiliwan a nagikot iti paltog bayat ti kaaddana iti maysa a natayan idiay Barangay Bayubay Norte, San Vicente, Ilocos Sur itay ala una kuarentay singko iti parbangon, March 5, 2025.
Ti suspek a nakemmeg ket ni Ronald Ragasa Pizarro, agtawen iti uppat a pulo ket maysa, naasawaan, tricycle driver nga agnaed idiay Barangay Balaleng, Bantay.
Iti pannaki-uman ti Bombo Radyo Vigan ken ni PCapt. Pedro Halover manipod San Vicente Municipal Police Station, nakaawatda iti tawag manipod concerned citizen a nangipakaammo iti panagikot iti paltog ti nasao a lalaki iti maysa a natayan iti nasao a lugar isu a nagrespondeda.
Segun ken ni Halover, idi kiniddawda iti panangipakitana iti linaon ti sling bag-na ket boluntaryo nga inruarna dagiti kargana a gappuanan ti pannakakitada ti caliber 9mm nga adda magazine ken tallo a balana.
Awan ti naipakita a firearm registration ken LTOPF ti suspek a gappuanan ti pannakakemmegna.
Inkalintegan ti lalaki agik-ikot laeng iti paltog tapno paganibna.
Iti agdama ket nakakustodiya ti lalaki iti San Vicente Police Station.
VIDEO – PCAPT. PEDRO HALOVER
