Imbutaktak ni Senador Panfilo Lacson a maysa nga opisial ti Department of Public Works and Highways a mabigbigbig nga ‘Undersecretary Cabral’ ti mapapati a timmawag iti staff ni Senate Minority Leader Vicente Sotto III tapno maawis ida a mangisayangkat iti early insertions iti 2026 national budget.
Segun ken ni Lacson, nagkedked ni Sotto iti naidiaya ken nasaludsod no asino pay dagiti naidiayaan ken no adda pay dagiti nagipasa.
Iti baet ti pammabalaw ni Presidente Ferdinand Marcos Jr kadagiti kongresista mainaig iti budget insertions iti SONA-na idi Hulyo, kinuna ni Lacson a ti panagsagana para iti National Expenditure Program 2026 ket nangrugi pay idi Enero 2025.
Imbutaktak pay ti senador a nakakita isuna kadagiti ginasut a maatap a proyekto iti NEP, agraman ti 660 nga item a sag-P100 milion ngem awan ti nalawag a detalyena.
