Nasalamaan ti maysa nga L300 van kalpasan a nagibiahe kadagiti baka nga awan iti naan-anay a permitna idiay Sta. Cruz, Sinait, Ilocos Sur.
Ti nagmaneho ti Mitsubishi L300 van ket agtawen iti uppat a pulo ket pito, naasawaan, nga agnaed idiay Baguinay, Manaoag, Pangasinan; kaduana dagiti dua a helper-na a lallaki nga agnaed met laeng iti nasao a lugar.
Nasalamaan dagiti kameng ti Ilocos Sur Provincial Animal Quarantine-Sinait ti nasao a lugan a naglaon iti tallo a baka.
Sakbay a nasalamaan, alas nuebe y media iti bigat iti June 13 ket nangisayangkat ti checkpoint ti Tagudin Animal Quarantine isu a pinakaammoanda iti Quarantine checkpoint iti Sinait nga inspeksyonen ti nasao a lugan ta naamman a nagibiahe iti pito a baka.
Ngem no pay kasta ket dua laeng iti sakup iti shipping permit para iti Ilocos Sur idinto a ti nabatbati a lima ket maipan koma idiay Ilocos Norte.
Ngem idi nainspeksyon ken dimmalan ti lugan iti quarantine station idiay Sinait, naobserbaran a tallo laeng a baka iti kargana.
Impakaammo ti driver a ti dua a baka ket nailako idiay Narvacan, Ilocos Sur idinto a dagiti dua ket nailako idiay Bantay, Ilocos Sur.
Gapu dayta ket naglabsingda iti section C iti Provincial Ordinance No. 15-06, Series of 2015 gapu iti saan a maikalintegan a panagidessaagda iti shipments iti Ilocos Sur imbes a ti naideklarar a point of destination.
Ti driver ken helper-na ket nakakustodiyan iti Ilocos Sur Provincial Animal Quarantine-Sinait tapno dumalan iti husto a proseso.
