Pagpalpalawagen ti Anti-Discrimination Panel ti Comelec ni Pasig City Congressional Candidate Ian Sia mainaig iti insensitibo nga angawna kadagiti single mother.
Segun ken ni Comelec Chairman George Garcia, naipatulodandan iti show cause order babaen iti task force ni Sia kalpasan ti panangidiayana iti bagina a makinaig kadagiti single mom, nangruna dagiti agregregla pay laeng.
Nailanad iti pammilin nga adda tallo nga aldaw ti kandidato nga agpalawag no apay a saan a nasken a mapilaan iti reklamo para iti election offense wenno petition for disqualification.
Ti insawang a balikas ni Sia ket posible a panaglabsing iti Comelec resolution a nakailanadan nga awan ti diskriminasyon a mabalin nga aramiden wenno ibaga kontra kadagiti marginalized groups, kas kadagiti babbai, miembro ti LGBTQIA+ community, indigineous people, dagiti nakaptan iti HIV, ken dagiti persons with disabilities.
