Target nga aprubaran ita a lawas ti House of Representatives ti gakat a sertipikado nga urgent ni Pres. Ferdinand Marcos Jr. a mangted ti presidente iti bileg iti temporaryo a panangkissay wenno panagsuspenso ti excise tax kadagiti produkto petrolyo tapno matignayan iti panagpangato iti presyo iti langis.
Iti salinong ti House Bill 8418, posible nga ipatungpal ti presidente iti panagkissay wenno suspension iti buwis iti gasolina ken dadduma pay a fuel products no adda nakaru a panagpangato iti presyo ti langis iti world market wenno panawen iti emergency.
Segun ken ni House Majority Leader Ferdinand Alexander Sandro Marcos, gagem ti gakat nga insigida a makaited iti nam-ay iti publiko sakbay pay a ngumina iti plete, presyo iti taraon ken dadduma pay a magastos.
Posible nga ipatungpal ti tax relief no ti average a presyo ti Dubai crude oil ket umabot wenno nagsurok iti $80 kada bariles iti uneg iti makabulan wenno no adda deklarado a national emergency a nagresulta iti nangato a presyo iti langis.
Nailawlawag iti gakat a ti suspension wenno panagkissay iti buwis ket agingga innem a bulan kaeng ken saan nga aglabes iti makatawen, ken mabalin nga aramaten ti presidente iti bilegna agingga December 31, 2028.
