Inlawlawag ni House secretary General Reginald Velasco a ti 20 million budget para iti maikatlo a State of the Nation Address ni Pres. Ferdinand Marcos inton July 22 ket saan laeng a nailatang para kadagiti taraon a maidasar
Kinuna ni Velasco a karaman iti 20 million pesos ti gastusen iti panagsagana iti SONA a nangrugi pay idi March 12 nga isu ti aldaw ti pannakabukel ti SONA task force
Karaman pay iti gastusen dagiti Inter-Agency Coordinating Meeting a dardar-ayan dagiti naduma duma a departamento ken ahensya a paset iti preparasyon ti SONA
Dagiti met taraon a maidasar iti kaaldawan ti SONA ket para kadagiti bisita, internal staff ken external personnel kas ti pulis nga agbantay iti seguridad iti aglawlaw iti Batasan Complex kasta met dagiti kameng ti Metropolitan Manila development Authority ken dadduma pay a support staff
Karaman pay kadagiti gastusen ti kamara ti tallo a set ti uniporme ti duaribo nga empleyado ti House Secretariat a saan laeng a maaramat iti kaaldawan ti Sona nu di ket iti panginaldaw da nga iseserrek iti trabaho.
Adda pay bayadna kadagiti tao ken equipment a mangsigurado iti seguridad ken kinaurnos ti SONA ken nayon a medical support manipud iti kaasideg nga ospita;l kasta pay nga adda ti rinentaan nga LED walls ken dadduma nga equipment a mangpapintas iti audiovisual presentation ken overall ambiance iti uneg ti plenary hall ken batasan Complex kasta pay dagiti dekorasyon malaksid pay dagiti imbitasyon ken giveways.
