Imbingay ni Jessa Zaragoza a dumaldalan iti health challenges ti asawana a ni Dingdong Avanzado ken sumagmamanon a lawas nga agsubli-sublida iti ospital.
Nagkiddaw iti pannakawan ni Jessa iti saanna a panagbalin nga aktibo iti social media ken kadagiti na-postpone a commitment-na ta nakatutok isuna iti panangtaripato iti asawana.
Segun ken ni Jessa, manipod Father’s Day wenno June 22 ket agsubli-sublidan iti ospital gapu iti karit iti salun-at ti asawana.
Inaminna a saan a nadaras iti panagtaripato iti maysa nga ay-ayaten iti biag nga adda sagsagabaenna kangrunaan idi nalpas a dimmalan iti operasyon ni Dingdong ken nai-admit manen iti ospital.
Nagyaman isuna iti pamilia, gagayyem ken amin a nangipatulod iti taraon, bimmisita ken nangisagut iti kararag para ken ni Dingdong.
