VIGAN CITY – Innem ti nakemmeg a nagsusugal iti tong-its manipud kadagiti dua a barangay iti ili ti Sinait babaen iti naiwayat nga Anti-Illegal Gambling operation.
Natiliw idiay Brgy. Pug-os da Gloria Concepcion, agtawen iti innem a pulo ket walo; Melchor Tabucol, agtawen iti pitopulo ket maysa ken ni Connie Tabucol, agtawen iti limapulo ket dua nga agnaed iti nasao a lugar a naalaan iti maysa a set ti baraha ken pusta a PHP 403.
Kabayatanna, idiay Brgy. Barikir a natiliw da Reymund Arrocena, agtawen iti limapulo, mannalon a taga-Tapao, Sinait; Rommel Palafox Arrocena, agtawen iti uppat a pulo, mannalon ken ni Melvin Salundi Castillo, agtawen iti tallopulo.
Naala kadakuada ti maysa a set ti baraha ken pusta a PHP 458 nga itan ket addan iti kustodia dagiti pannakabagi ti linteg tapno maidalan iti husto a proseso.
Iti pannaki-uman ti Bombo Radyo Vigan ken ni PLt. Joel Idica, Officer in charge ti Sinait Police Station, patienda a datin nga aramid dagiti suspek ti agsusugal uray no awan ti natayan ta dagiti dua a lugar ket nainget a bambantayanda gapu kadagiti naidandanun kadakuada a pasamak ngem dayta laeng a gundaway a naaktuanda dagiti suspek.
