Imbutaktak ni Department of the Interior and Local Government (DILG) Secretary Jonvic Remulla a pinanggep ti maysa a contractor ken maysa a kongresista wenno cong-tractor a pasuksukan isuna ken ti kabsatna a ni Ombudsman Jesus Crispin Remulla iti P2 billion iti baet ti imbestigasyon iti maanomolia a flood control projects.
Segun ken ni Sec. Remulla, naidalan ti panggep a panagpasuksok babaen ti emissaries iti contractor ken ti nakatugaw a cong-tractor, ti maysa a grupo ket Visayas-Mindanao group idinto a ti maysa ket Luzon group.
Mapapati a kiniddawda a matulongan iti kasoda ket maikkat iti listaan ken makapyansa.
Inlawlawag ti secretary a saan nga insigida a nakemmeg dagitoy iti baet iti panagpanggepda ta nadaras laeng iti lumisi ta ibagada laeng a hearsay wenno naaramid laeng dagiti nasao nga istorya ta saanda a direkta a nagidiaya iti pasuksok.
