VIGAN CITY – Manarimaan pay laeng iti imbestigasyon dagiti otoridad iti napasamak a pannagbat idiay Barangay Besalan, Sta. Cruz idi May 17 a nakatayan da Loreto Sanches Carbonel nga agtawen iti uppat a pulo ket innem a taga-Besalan kenni Jerome Ragudo Domingo nga agtawen iti dua pulo ket siyam a taga- Camangaan, Sta. Cruz.
Segun ken ni Police Lieutenant Danilo Ricud, deputy chief of police ti Sta. Cruz municipal police station, mapan kuma iwayway ni Leo Hagunos Carbonel dagiti taraken na a baka iti asideg ti lugar a nakapasamakan iti krimen idi nakita na dagiti natay a biktima a nakaidda iti indayun idinto a ti lalaki nga agtawen iti sangapulo ket tallo a ni Johnwin Hagunos Carbonel ket natnag iti indayun a nagturugan na nga arigna agpapaarayat.
Agpapada a dunor iti ulo ti sinagaba dagiti tallo a biktima ngem ti laeng lalaki nga agtawen iti sangapulo ket tallo iti sibibiyag idi nagresponde dagiti otoridad iti report ni Leo isu a naitaray iti kaasitgan nga ospital ngem naiyalis idiay Ilocos Training and Regional Medical Center, San Fernando City, La Union.
Awan ti nakakita iti pasamak ta sangagasut agingga dua gasut a metro iti kaadayo dagiti pagtaengan iti compound nga ayan dagiti baboy ken manok a banbantayan dagiti biktima.
