Pinasingkedan ni Senador Erwin Tulfo nga agbalin laeng a “zarzuela ken telenovela” no imbestigaran pay ti Senado ti pammabasul dagiti 18 a suldado a mapapati a nangipatulod iti binilion a gatad kadagiti sumagmamano nga opisial ti gobierno.
Kinontra ni Tulfo dagiti pammabasul, ket kunana a nasaysayaat no ipaima lattan ti imbestigasion iti Office of the Ombudsman ken Department of Justice tapno saan nga agsayang ti Senado iti oras.
Kabayatanna, pinasingkedan met ni Panfilo Lacson, chairman ti Senate Blue Ribbon Committee, a kitaenda ti kredibilidad ti nagtaudan ken linaon ti affidavit sakbay nga agdesision iti pormal nga imbestigasion.
Nangipila pay ni Senador Imee Marcos iti Senate Resolution 317 tapno maimbestigaran ti mapapati a money delivery a nakairamanan dagiti dati a militar ken sumagmamano a nangato nga opisial, agraman ni Presidente Ferdinand Marcos Jr. ken dati nga Speaker Martin Romualdez.
