Dandanin ikkaten ti Iloilo Airport ti initial security screening tapno maaddaan iti nalawlawa nga espasyo para kadagiti pasahero.
Inruar ni Transportation Acting Secretary Giovanni Lopez iti bilin kalpasan iti panag-inspect-da iti Iloilo Airport kas pinasingkedan ti Department of Transportation (DOTr).
Segun ken ni Lopez, kasapulanen nga ikkaten ta doble iti proseso, ken isu pay iti bilin ni Pres. Ferdinand Marcos a rumbeng a mangilatang iti dakdakkel nga espasyo para kadagiti pasahero tapno saanda nga agdudupudop iti panag-check in.
Nupay kasta masapul a dumalan dagiti pasahero iti final security check sakbay iti panagserrekda iti boarding gates.
Kiniddawna iti Iloilo Airport management a leppasen ti plano para iti pannakayatiddog iti passenger terminal building.
Innayon ni Lopez a ti implementasyon iti automated check-in nga adda iti facial ID recognition-na ket mapadaras tapno saan a marigatan dagiti pasahero kangrunaan iti peak hours.
